منتدي ابناء ودعجبنا الثقافي

اخبار منطقة ود عجبنا واخبار ابناء ودعجبنا بالخارج


    رائعة محمد طه القدال

    شاطر
    avatar
    aldabi

    عدد المساهمات : 41
    تاريخ التسجيل : 03/04/2010
    العمر : 34
    الموقع : King Saudia Arabia

    رائعة محمد طه القدال

    مُساهمة  aldabi في الأربعاء مارس 07, 2012 10:14 am

    بقول غنوات وأقول غنوات
    فى البلد ا لبسير جنياتها لى قدام
    ولى الولد البتل ضرعاتو فى العرضة
    ويطير فى الدارة صقرية
    ولو السمحة تلت إيد ومدت جيد
    يقوم شايلاهو هاشمية
    ويشيل شبال ختفة ريد وفرحة عيد
    وريدة روح وحمرة عين وايدية
    * * *
    ويالولد البشيل مدقاقو
    قولة خير على القمره
    يقابل الجاية متحزم
    ويدارك الجاية متلزم
    كلام فاسك على أرضك
    يبقى عديلة يا بيضا
    ويبقى زفاف تزغرد ليه قمرية
    * * *
    وقبال حول تغّيم غيمة قِبلية
    ترش الدارة والحدبه الصعيد الحلة
    ويا فرحة بتطارد الصفقة فى النسمة الصعيدية
    ويا جهرة نهار الليلة بدرية
    رحيح جنياتنا فى الحدبة الصعيد الحلة
    * * *
    يا سمحاتنا هو لبلب
    ويا قمحاتنا هو لبلب
    وياللوز الفتق فى الوادى هو لبلب
    ويا سمحاتنا هو لبلب
    ويالبحر الطمح مدّادى هو لبلب
    سألتك بالذى ركز الارض معبد
    وسوى الفاس عليها مقام
    سألتك بى حشا الأُمات ودمعاتنا
    * * *
    سألتك بى كبيداتن ودعواتنا
    شليل وين راح؟؟
    يكون ضل الخريف فاتنا
    شليل وين راح؟؟
    وزى برق السماك الجابها دغشية
    وزى زغرودة البطن الكبارية
    مرق من شامة القمره
    ومقدم بالعديل يبرا
    تعالوا أبشروا آجنيات
    شليل ماراح شليل ما فات
    شليل عند المسورو حرق
    بقالو حصاد
    شليل فوق التقانت قام خدار وبلاد
    شليل مسدار شليل مشوار
    شليل أرضنا يا جنيات
    شليل قايم نصاصى الليل
    يتمتم ليلو وردية
    حرازنا شليل شليلنا دليب
    شليلنا دليل على البلدات
    بعد درب التبلدية
    شليل ما راح شليل ما فات
    شليلنا ونحنا همباتة ومهاجرية
    مزارع بات على عشقين
    تراب بلدو وسماح فوق بت مزارعية

      الوقت/التاريخ الآن هو الأربعاء سبتمبر 20, 2017 11:10 pm