منتدي ابناء ودعجبنا الثقافي

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
منتدي ابناء ودعجبنا الثقافي

اخبار منطقة ود عجبنا واخبار ابناء ودعجبنا بالخارج


    عمــــــــــــــــنا الحاج ودعجبنا

    aldabi
    aldabi


    عدد المساهمات : 41
    تاريخ التسجيل : 03/04/2010
    العمر : 41
    الموقع : King Saudia Arabia

    عمــــــــــــــــنا الحاج ودعجبنا Empty عمــــــــــــــــنا الحاج ودعجبنا

    مُساهمة  aldabi الأربعاء مارس 07, 2012 10:09 am

    عمنا الحاج ود عجبنا فى الفريق ياهو الركيزة
    هو البشيل حمل الرباعة وعندو كلمة على الجماعة
    فى الفريق باقيلنا تاية وكل طيب ليهو غاية
    للضعيف تلقاهو ساند ويقهر الكعب المعاند
    للضيوف ديوانو فاتح ديل يقوموا وديل ينزلوا
    يا ولد جيبو الرتاين جيهو الديوان فراشو
    والأباريق والتباريق وأفرشوا الفرشة الكبيرة
    وأضبحوا الحمل المدعول
    عمنا الحاج ود عجبنا من سنين أيام جهلتو ديمه فى
    دعوات صلاتو يسأل المولى السلامة وسترة الحال
    والكرامة .
    عمنا الحاج ود عجبنا فى ليلة من زات الليالى وفى
    زمن حظر التجول جاهو ضيف فوق راس حداشر
    رحب الحاج بيهو جدا فرشولو نزلوهو وكاسو للعشاء
    ما أتلقالوا الرغيف ممحوق مقصر والبلد فى حال
    تعسر عمنا الحاج فى مبادؤ وجبة الضيف زى فريضة
    وهسه ضاقت بيه العريضه وضيفوا كيف يترك عشاهو ..؟
    ومن دى زايد اختشاهو ...
    وجاتو فكرة ............!
    يمشى للفرن المجاور وللجان العيش يشاور
    بس عشاء الضيف ياجماعة ......!
    ضيفى نازل ليهو ساعة ........!
    شاكلوهو ..نهروهو....دفروهو ..
    وجاتو دورية الطوارى وامسى بايت فى
    الحراسة وناسو جنو وللصباح ما عرفوا حاجة
    وين ده روح........؟
    وجاهم الخبر المأكد ود عجبنا فى الحراسة
    ماشى محكمة الطوارى
    ناسو اولادو وبناتو عرفو حالو وبدرى فاتو
    راحو محكمة الطوارى فيها فى نص الخلايق
    شافو حالاً ماهو لايق عمنا الحاج بى
    جلالو فيه حس الصوت يولول فوق قفاهو
    فوق زنودو وفوق رجولو ومره فوق فججاً
    حشاهن أصلو ما قايل بطولن حتى كان نزلن
    هجاين الا لكن الليالى يوم بترخص كل غالى ...
    حاكموا الولد المنصب كتفوا بالدبور مقصب
    أنت ياحاج يا مخالف .....زول مخرف وعقلو تالف
    أنت يا زول ماك دارى زلة الناس فى الطوارى
    أجلدوهو ...غرموهو...نفذوا الحكم البهينو شان
    يفتح تانى عينو .....
    تسمع الصوت ليهو خاويه وفوق قفا الحاج صيحتو
    داوية كل جلدة جبل مزلة فوق ضمير الحاج وقلبه
    كل كرباج الف عله فجأة رفع الحاج عينوا...
    شاف بنات ولدوا وبناتو كلهن واقفات يعاينن
    دمعتن فى العين ترقرق وجعتن فى الجوف تحرق
    والحزن ليهن مغرق .. ده النجوم الفى سماهن
    ده الزمان الكان حماهن كل صوت نازل عليهو
    من شعاع الضوء عماهن عمك الحاج دمعو
    زرف وسيلو فوق أشنابو سرب تم حكموا وراح
    بيوتو نفسه مكسورة وزليلة ...
    وكيف ملاقاة الحليله ..؟
    وصحوة الروح العليله...؟
    فى البيوت الجوه غااااادى
    عمك الحاج ما اعتيادى
    وفوقوا متلمين جماعتو
    والثكيلى ضرب حزاينى
    قالوا ناداهوا المنادى
    فارق الدنيا المهينه
    يقطع الزله وسنينها
    فوق فراش حاج ود عجبنا
    تسمع الزول البوصى
    أقفلوا الحوش يا جماعة
    وطفوا انوار الرتاين
    داك حرس حظر التجول
    من بعيد ليكم يعاين
    يا زمن حظر التجول
    يا زمن
    حظر
    [center]

      الوقت/التاريخ الآن هو الخميس مارس 28, 2024 4:32 pm